Skip to main content
Club

Xa está aquí o Campus de Verán do CD Lugo

Lugo, Sarria, Chantada, Burela e Maniños acollerán o CDLUCAMP nos meses de xuño, xullo e agosto

Coa chegada do Verán volta un dos momentos máis agardados polos nenos e nenas de todo Lugo, os Campus de Verán do CD Lugo. Esta mañán foi presentada na sala de prensa do Estadio Anxo Carro unha nova edición do CDLUCAMP. No acto estiveron presentes Pablo Rivera, Deputado de Deportes da Deputación de Lugo, Carmen Mier, Responsable de marca do CD Lugo, e Julián Castaño, director dos Campus.

 

Os Campus que organiza o CD Lugo, pretenden, co deporte como protagonista, difundir os valores propios da entidade non so na cidade de Lugo senón tamén en toda a súa provincia. Como lembrou a responsable de marca do CD Lugo Carmen Mier. "Queremos achegar o CD Lugo a todos os nenos e nenas da provincia". Mier desvelou tamén unha das principais novidades de esta edición, que será a cesión que fará o Centro Deportivo Forus de parte das súas instalacións para que "parte dos nenos poidan, ademais de xantar todos xuntos, ter actividades de ocio e lecer nas súas instalacións."

 

A solidariedade, o esforzo, a igualdade, as habilidades sociais ou a cultura do esforzo serán o eixo transversal que servirá de nexo entre as distintas actividades que compoñen o CDLUCAMP. A concienciación dos participantes é unha das chaves de esta actividades como destacou o seu director, Julián Castaño: "O fútbol será o protagonista das sesións. Traballaremos de acordo a metodoloxía que vimos desenvolvendo nas categorías inferiores, pero ademais creemos que é moi importante utilizar o deporte como forma de transmitir determinados valores aos nenos e nenas."

 

Pola súa banda, o Deputado de Deportes, Pablo Rivera Capón, subliñou que "dende o Goberno da Deputación estamos encantados de colaborar con iniciativas como esta que axudan a potenciar o deporte base lucense, ademais do claro compoñente formativo que supón para os máis cativos, pois durante os campus de verán ademais de aprender e xogar ao fútbol, tamén adquirirán valores intrínsecos a este deporte como a superación persoal, o traballo diario, ou a constancia na consecución duns obxectivos".

 

Chantada e Burela repetirán como sedes trala experiencia positiva do ano pasado e Sarria súmase tamén este ano como sede dos campus. Por vez primeira o CDLUCAMP sairá da provincia de Lugo e será a vila de Maniños, no concello coruñés de Fene, o lugar que albergue a actividade. 

Esta actividade, na que poderán participar os nenos e nenas nados entre 2001 e 2011, arrincará a semana do 25-29 de Xuño en Sarria. As seguintes quendas serán Lugo e Chantada (2-6 Xullo), Maniños e Burela (9-13 Xullo) e unha última en Lugo (27-31 Agosto). As inscricións poderanse facer a partir do luns 7 de maio na web www.cdlucamp.org, na CDLUStore (Praza de Bretaña, 22) e nos clubes colaboradores (Porto de Burela, Sarriana, SD Chantada, Cultural Maniños.). A fecha límite será o mércores anterior o inicio de cada campus. As prazas estarán limitadas a 50 inscricións en Burela, Chantada, Sarria e Maniños e a 80 prazas en Lugo.

 

Para máis información:

www.cdlucamp.org

eventos@cdlugo.com

647 317 190

Image